Nok ein gong har eg strikka dette sjalet. Eg tykjer berre at det er så fint. Denne gongen har eg og brukt Drops Lace i ein litt melert lilla farge. Dette garnet er så tynt og lett at ein fint kan bruke det om sommaren og.
Sjå dei fine blomane eg har i hagen min 
Eg har to peoner i hagen min, og den eine blomstrar no. Det er berre to greiner på den, og begge har ein blom kvar.
I dag fekk eg høyra noko hyggeleg som gjer at eg kan strikka småting……..
Long time no see 
Endeleg har eg fått blokka sjalet som har lagt ferdig ei stund.
Mønster: Haruni av Emily Ross.
Garn: Wollmeise 100%.
Pinner: 3.5 mm (trur eg).
Eg har strikka den enkle versjonen med glatt strikk før eg starta på blondekanten. Til å begynne med var eg ikkje sikker på om eg likte den enkle varianten, men etter å ha blokka det så tykjer eg det vart fint dette og. Kanskje det vert fleire…ein gong. Litt herk var det under blokkinga, sidan det skulle ei knappenål i alle luftmaskebogane. Men med nok knappenåler så gjekk det og.
Sjå dei fine alliumane som sprett ut…og for nokre fargar…
Her kjem eit lite bilderas av det siste sjalet eg har strikka. Sjalet er strikka i garn frå den nye serien til Du store alpakka, Dreamline. Eit florlett sjal, som veg omtrent ingenting. Dette heng no på Sy og strikkebui i Sogndal.
Ting tek tid, men endeleg er sjalet vaska og blokka. Fotografert i alle vinklar…..Må berre få sei at no blomstrar det som berre da i hagen min. Den store rosa på bildet under har ikkje herdighet til å overleve her eg bur ein gong, gjett om eg er stolt.
Garn: Odara, farge Autumn Sky, 50% merino og 50% silke. Saffrondyeworks
Mønster: Summer Mystery Shawlett av Wendy D. Johnson
Pinner: 4,5 mm.
Dette sjalet har vore eit samstikkprosjekt på Projo, denne sommaren.Eit enkelt og lite sjal. Kunne godt ha vore litt større.
Litt trøytt i trynet etter å ha vore på ei travel nattevakt og ikkje sove meir enn 5 timar. Viss eg ikkje får sova meir kjem det til å å bli ei pyton nattevaksthelg…..For de som ikkje skal sova på dagtid, ha ei fin helg.
Del 2 av samstrikket er ferdig. Har no vore ferdig ei stund, men det tek tid å blogge for tida. Det har vore mykje jobbing og når det har vore fint ver så har eg vore ute heile dagane, og då vert det lite blogging. Håpar å koma sterkare tilbake…
Til deko som framleis har ferie…kos dykk
Då har eg endeleg starta på del 1 i sjalsamstrikket. Ferdig er den og på ei lita kveldstund
Garnet er frå Saffrondyeworks, Odara farge Autumn Sky 50% merino og 50% silke. Heilt herleg å ta i….
Etter 6 dagar på reising, har sjalet vakse so mykje. Vart strikka ein del på flyreisa, og på dei to 8 turars båtturane me hadde til Pyramiden og Barensburg. Heldigvis valde eg ei sjal med mykje glattstrikk fyrst, for då får eg med med meg litt anna medan eg strikkar. Når eg er kome til mønsteret så må eg konsentrera meg om det
På vegen heim att så hadde me ei natt i Tromsø. Og der hadde dei ein fin garnbutikk som heiter Snarby Strikkestudio, og gjett om eg måtte inn der. Masse fint garn hadde dei, så eg kjøpte med meg 3 hesper Cashmere Lace 1 Drops Lace og 1 Noro Kureon Sock Yarn. Gudane må vete kva eg skal strikke, for eg veit det ikkje. Men kjekt å ha er det no. Flott garnbutikk, med stort utvalg.
I dag har me hatt sol heilt til no i kveld. Då kom regnet att.
No har eg ikkje mykje att av ferien min, berre ei veke. Fint å ha hatt ferie, men veret har ikkje vore med meg i det heile. Håpar de har hatt betre ver enn meg.
Har sete ute i dag og nøsta opp hespet med 300 gr wollmeise lace. Det var inga varm fornøying, då det regna og blåste. Gradestokken viste berre 11 grader. Så det var berre å koma seg inn fortare enn svint, og fyra i ovenen. Etter opp nøsting så viser vekta 316 gram med garn. Så kva vert det strikka av dette, jau eg trur eg går for Seraphim sjalet som eg har strikka før. Og for å få det større så kan eg vel berre strikka fleire mønsterrapportar, på sjølve mønster delen. Dette kan vel verta eit fint flystrikk, då eg skal til Svalbard i sommar.
I går var det sol og varmt på ettermiddagen. I dag så er det kaldt og det regnar.
Kor vert sommaren av?
No har eg prøvd meg på dominostrikk for fyrste gong. Ganske kjekt var det og faktisk. Vert ikkje så lange omgangar. Startar me 41m. og feller til du står att med 1m. gong på gon til det er stort nok. Eg og ei veninde starta omtrent samtidig, så me får kalle det samstrikk. I det siste har det vorte lite strikking mot vanleg, for her har det stortsett vore ski fleire gongar i veka. Og då vert ein litt sliten om kvelden….resultatet vert då lite strikking….
Mønster: Familien nr.2
Garn: Mini Palett frå Sandnes garn
Pinner: 4,5 mm
Fruen i huset har strikka ei lue frå arne & carlos sitt luehefte. Vart visst ein litt baggy variant dette. Hadde nemleg lest ein plasse at luene var litt trange, så eg strikka litt lausare enn normalt og brukte litt tjukkare pinnar for eg hadde ikkje den storleiken som stod i mønsteret. Og resultatet vart ei litt stor lue. Men, men ein kan ikkje vere like alle……
